mawtini 2 not found 404 :((

Posted: Tuesday, May 11, 2010 by titof in
0

pfffffffffffffffffffffffffffffffffffffffffffffffffffffffffffff

البوليس يحول مقر اقامة زهير مخلوف الى الشرنيكول

Posted: by titof in
0

خبر عاجل :اجرى النائب زهير مخلوف المناضل الاعلامي والحقوقي والسياسي عملية جراحية على انفه اليوم وهو تحت تاثير التخدير الكلي نذكر ان اصابة انفه بكسور كان نتيجة الاعتداء الاخير عليه عندما تقدم اعوان من الامن بالزي المدني لايقافه دون موجب قانوني او الاستظهار باذن قضائي وبقي محجوزا يومها الى الساعة منتصف الليل ثم اطلق سراحه دون تبرير الايقاف وصرح زهير مخلوف ان عملية ايقافه كانت من اجل منعه من حضور لقاء مع عميد المحامين في فرنسا الرجاء من كل المتضامنين مع نائبنا الموقر زيارته اليوم في مستشفى شارنيكول قسم الحنجرة والانف للتعبير عن مساندتنا له ولان زيارة المريض واجب مواعيد الزيارة من الساعة الواحدة بعد الزوال الى الساعة الرابعة مساءا وهذا رقم هاتف زهير لكل من يتعذر عليه القدوم ويرغب في الطمئنة على صحته :


التن لحمر و الاحتباس الحراري

Posted: Friday, April 23, 2010 by titof in
0

تو نهارين لتالي جمعتني الظروف مع عالم بحار بون هو موش عالم بحار بالضبط اما اختصاصو في الميدان هذا و بالضبط الحوت
ولو اني مكنتش نتصور انو الحوت عندو الاهمية هاذي باش ناس تقرالو عشرية اخرى بعد الباكلوريا و الي هو الانسان و العلم متاعو يقرالو اربعة سنين برك
المهم اللقاء الي جمعني مع السيد هذا اصر انو يحكيلي فيه عالتن الاحمر و مادراك ما التن الاحمر الي كيلوه يساوي 150دولار امريكي في الوقت الي كنت نعتقد انو اغلى حاجة في دنيا هي الغنمي و الهبرة 10 دولارات للكيلو
و بمجرد اني سمعت السعر متع الكيلو عرفت انو الامر ميعنينش و كونو هالنوع يتعرض لانقراض و لا الانفجار الديمغرافي و لا حتى للابادة الجماعية فهي مسالة متعنينش مدام الترليا و الشاوري و السكورمي متواجدين منجمش نحكي على خطر يهدد البحار و اعماق المحيطات
و مدام اليابانين مزالو مفقوش بالسردينة ديما نحمدو ربي
الحاصل موش هذا الاشكال
فالى جانب انو السيد سمالي انواع متع حوت اقل اسم عالثالث و خير من اسم عبد قريب باش نقلو شوفلنا حوتا تفيزلنا للروب
اصر انو يقنعني انو مسالة تن لحمر مسالة خطيرة و لازم الجهات المعنية تاخو بعين الاعتبار المسالة هاذي و علاش لا تتدرجها ضمن اولوياتها
منعرفش علاش ابتسمت ابتسامة ساخرة موش باش نقص من قيمة سيد بلعكس انا من الناس الي تفتخر بالكفاءات التوانسة لكن حسيت انو ثمة برشا ازدواجية
وقت الي تجي لدولة من العالم الثالث تشم في ريحة الديمقراطية و تعدي بالخبز الشايح و تحكي لشعبها عالاحتباس الحراري و التن لحمر المهدد بالانقراض منتصورش انو لحكاية باش تعني حاجة كبيرة لناس هاذم
الي همهم بالاساس يخلطو على كيلة سردينة بدينار و الا يلقاو خدمة يسترو بيها رواحهم و الا حتى ينجمو
يكتبو تدوينة من غير ما يخممو في الي يكتبوه عشرة الاف مرة

المفارقة هنا انو اجتماعات دولية قاعدة تصير و مؤتمارات على مستوى عالي و اقليمي للمعالجة الحكاية هاذي في الوقت الي حد ما فكر انو سكان غزة ممكن ينقرضو من الصيد العشوائي الي تمارس فيه اسرائيل
زعمة وصلنا لوقت انو التن لحمر و لى اغلى من الانسان

حالة الاختناق المفتعلة و عنف الملاعب

Posted: Saturday, April 10, 2010 by titof in
0

اخيب حاجة في التدوينة نحكي بالنسبة لناس الي ترتجل التدوين الدخلة تبدى تحاول كفاش تلقى الكلمة الي باش تستفح بيها تدوينة
ياتبدى بالتسليم يا تعطيها ضربة بندير للقراء يا تبعث الناس الكل تمارس رياضة التزمير و تدخل في صلب الموضوع طول
المشكلة هاذي تلقاها عند المدونين الي يرتجلو في تدوينات يعني ميحضرش التدوينة قبل بجمعة ويبدى يراجع و يصلح ويزيد وينقص و كان ثمة حكاية ينقص باش يواكب
النوع هذا متع التدوين و حتى ان كان يعطي تدوينة حلوة و منهجية الا انو ميستهوينش نظرا لانو التدوين بالنسبة ليا هو لحظة عفوية تنعكس من مواكبة حدث معين في لحظة ما
المهم منطولش عليكم و ندخل في صلب الموضوع طول و خاصة اني هاني دبرت مقدمة


التدوينة هاذي باش نحكي فيها في موضوع كالعادة قديم جديد قديم من حيث المضمون و هو العنف في الملاعب
و الشكل هو حجم العنف

يعني العنف معاتش مقتصر على كعبة فلام و الا تراشق بالحجارة و انما انتقل الى مواجهة مباشرة مع رجال الامن و مواجهة اقل ما يقال عنها انها دموية في الوقت الي في كل ترح ولى عنا جرحى و قتلى
صحيح عرفت الملاعب متاعنا قبل اموات و صدامات في باجة مثلا عام 2000و اتوروت سوسة لكن الامن كان في كل مرة ينجح في السيطرة عالموقف و الاحتواء متاعو
نحكي من منطلق اني انسان واكبت بعض اعمال الشغب بحكم اني كنت متابع قديم لنادي متاعي لكن تو بطلت و لاسباب كنت حكيت عليهم قبل هنا

عاد حسب ملا حظت في الاونة الاخيرة عل الاقل انو توجه في الملاعب و الفيرجات خذى منحى اخر ينجم يكون كل شي الا كورة
خاطر في الوقت الي تلقى فيه اغنيات و اهازيج مطلعها اذا السلطة و الحكومة تحكم باحكامها ما لا قلولنا الحرية وين مكانها اضافة لحضور معجم الثورة سواءا على مستوى الكلمات ديو ديو ايا البوليس احنا لي جون جامي نخافو ...نديرو ثورة في كل مدينة ...خاطرها نموتو شهدا...الترجي حارب الاستعمار و غيرو
اما على مستوى الاطار الرمزي نلاحظو و جود شخصيات يسارية ثورية تشي و ماركوس و الزبتيستا الرموز الي تغذي الفكر الثوري و تاطرو و و يستمد منها شكلو الي نشوفو فيه اليوم في المكان الخطأ
يعني حضور مثل هذه الرموز و الكلمات يعكس الخلفيات متع الناس هاذم و الي الكثرين سواءا على المستوى الاعلامي او غيرو يسوقولهم على انهم بطالة و ماركة حرابش و مجرمين
لانو بصراحة منتصورش انو انسان فصالة باش يفهم يحكي على ماركوس و ثورة الزبتيستا و الا تشي و الا حتى يكتب كلمات اغنية تنم عالاطلاع على ما يحدث عالساحة العالمية

الناس هاذم تروج للحكيات هاذي من منطلق انها تلقى شماعة و متحطش يدها عالجرح و ذلك باتهامها للجمعية و تحميلها المسؤولية
و كانو عقاب فريق و تجميد حكم او عقاب جمهور باش ينسف الظاهرة هاذي
و هنا منيش نبرر في الي صار و منيش نبرر في العنف


وهو كي تجي توف تنجم الحلول السابق ذكرها تكون ناجعة بالنسبة لشخص يقرى في الظاهرة هاذي كظاهرة منعزلة عن المجتمع و ما يحدث خارج الملعب
لكن بما انو الظاهرة هاذي مهاش منعزلة و مهاش ظاهرة مستقلة نتصور الاجراءات بل نأكد انو الاجراءت متع العقوبات الي تتخذ فيها الجامعة او الهياكل الامنية باش تكون حلول وقتية ومهاش باش توقف المهازل الي تصير


يعني وقت نفهمو انو الملعب هو المكان الوحيد الي الانسان يتنفس فيه من حالة الاختناق المفتعلة الي يعيش فيها
وقت نقول انو المكان الوحيد نقصد كامل فئات الشعب من حثالتها لدكتورها بحكم انها المكان الوحيد في غياب لمنابر اخرى
اذا مقلتش كامل المنابر الي ظلت محصورة على فئة معينة احتكرتها و طوعتها لمصالحها
وقت نفهمو انو الملعب هو البلاصة الوحيدة الي التونسي ينجم يقول فيها لا
و البلاصة الوحيدة الي ينجم يدفولي فيها و يحكي فيها عالقرينتا و الرفلسيون وقتها برك تو ندركو انو من الغباء ذبح النوادي و جعلها شماعة نعلق عليها ظاهرة تمشي و تتفاقم و كل مرة تزيد تاخو بعد دموي اكبر
و قتها ممكن نمتلكو الشجاعة و نجمو نعالجو الظاهرة الي لتو نعالجو فيها بالعنف و العنف مع الاحتقان ما يزيد يخلق كان عنف
الحاصل ربي يقدر الخير و برى

المبيد الحشري للخوانجية و استمرار المهزلة الفايسبوكية

Posted: Friday, April 9, 2010 by titof in
0

شكون الي قال احنا التوانسة ناس و اقعين و متحضرين و نؤمنو بالحوار ؟شكون قال احنا توانسة شعب مؤهل لديمقراطية واعي و قادر يمسك بزمام الامور و لايحتاج الى الوصاية
شكون قال انو الاشكال ليس في شعب و انما في النظام
خاطر بان بالكاشف انو لكلام هذا كلو هزان و نفضان ومغالطات و ما يقولو كان انسان مهوش يعايش في الواقع متاعنا
و اكبر دليل على كلامي هو ظاهرة الفيتوكس الي طالعة هليمات في الفايس بوك
ارتحنا من صفحة طلعتلنا صفحة بعنوان غريب برشا اسمها المبيد الحشري للخوانجية عنوان اعتباطي بهيم شوية يدل على جهل و غباء بمكونات التيارات الفكرية التونسية و بالتالي تنجم ترجح انو القايمين على الصفحة هاذي كمشة مفرخ لا اكثر لا اقل ماهمش فاهمين الكلام الي يقولو فيه
خاطر و قت تقول خوانجية بالضرورة تقصد في الاسلام السياسي و في تيار الاخوان المسلمين موش اي
انسان مسلم
و الغريب انو البروفيلات المتهمة بالتخونيج فيها ناس لا علاقة بالاسلام يعني حملة على بعضو من غير النظر في الخلفيات و الا اي حاجة
اضافة الشعارات البراقة التي تميز الصفحة هاذي من قبيل تونس ستلفظكم وووويعني ميزيش حطو
راوحهم اوصياء عالفكر
حطو رواحهم زادة ناطقين باسم تونس
لاول مرة في حياتي نؤمن بوجوب تدخل عمار404على خاطر الشعب المراهق فكريا لازمو الوصاية
ولاش الواحد يحوص متنكر عالفايس بوك زادة ويبعق لصحابو في ميسجات راني انا و موش انا الوحيد برشا مدونين زادة ملي لقاو روحهم في مرمى النيران متع الصفحة هاذي و هاذي راصتلهم هوما زادة يتنكرو حفاظا على تواجدهم
الحاصل منيش عارف هالبلاد وين ماشيا

فيتوكس

Posted: Monday, April 5, 2010 by titof in
2


مع تيتوف ماو اعمل مجهودك


السلام عليك و مرحبا بيكم في مدونتي الي مدام مزال فيا نفس هاني ندون فيها بون ممكن باش نقص من حدة الخطاب اما موش باش يولي انبطاحي خاطر صوابع ايديك موش كيف كيف
صحيح الو احد موش لا عبها بطل اما زادة الازدواجية و الترهدين موش باهي
كيما تعرفو الناس الكل مدونتي تعرضت للنسف مدونة موطني و اختفا من اشريفها قرابة70 ارتيكل
اكثر هم خوطر شعرية و الواضح انو الفاعل مهما كانت صيفتو ميتمتعش بالذوق الادبي و مهوش متع فراشات وغرام

المهم تزامن نسف مدونتي مع غلق حساباتي عالفايس بوك ثلاث مرات متتالية السبب الي خلاني نبدل اسمي لتونسي جويست تفديا لغلق الحساب مرة اخرى او قرصنتو و ركشت وخيكم نستنى في مرور العاصفة
المهم منيش باش نطول عليكم و باش نتعدى لحكاية قديمة جديدة حكاية الحروب الافتراضية و القيرة بين شباب يعتقد انو يهان في دينو و معتقدو وبين ناس تعتقد انها تمارس في حرية التعبير لكن المرة هاذي و الجديد في لحكاية انو الجانب الاول لقى استراتجية جديدة و هي تبليغ عن الحسابات
العملية هاذي ضربت بقوة و تحذفت مئات الحسابات الشي الي خلى الطرف الثاني و امام عجزو لفهم الموقف و خاصةانو البعض منهم يدعي الذكاء و احنا التوانسة منحبوش شكون يعديها علينا يبحث عن شخص يلبسلو لحكاية
الامر شبيه برشا بلي صار مع زيدان في موقع المرصد الاسلامي وقت اتهموه انو هو الي عمل صفحة الله لتصفية حسابات شخصية
و الدليل كالعادة مصادر موثوق منها
و المرة هاذي السيناريو يتكرر معايا انا و الابطال متاعو المرصد الوطني للغباء و هوما زوز نكرات يسعاو لتصفية حسابات شخصية
الاول هو المحقق الفذ الي تقريبا ما فلت حتى حلقة من محقق كونان و الي سارع الى الحساب متاعي بحثا عن انديس واو حتى مجرد اشارة الي انا مشترك في صفحة الفيتوكس لكنو مقاش و بمانو محبش يرجع خاوي الوفدين سرق تدوينة رحم الله وطني و الي خارجها عن سياقها وو ظفها كما اراد هو بغبائه الكوناني الساحق و استنتج منها الي انا انشات الصفحة
منعرفش كفاش ؟؟قالك السيد هذا ناقم ؟؟و مهوش ناجح في قرايتو هههه و وووووو تقولش السيد عايش معايا اضافة لنقشة خوانجي و ظلامي
اما ميسالش يا متفتح يا متع سلوى و قت انتي يا صديقي تبيع في الملابس الداخلية في الماخور و تلوج على بوك غادي و انتي تعترف بهذا و لاتنكره في قصصك المريضة انا خوك في مقاعد الجامعة و حامل لزوز اختصاصات اختصاص في التصرف و اختصاص في التنشيط السياحي وبملاحظة حسن جدا و تقريبا تعرف السياح و السائحات موش يلوى هاذم و بائعات الهوى في عبيد الله الي تبدى تذل في رجوليتك باش تبيعلهم سترينغ و بعد تجي تفلم على خلق ربي
يا سيد الي نعرفهم انا يخصرولك كيما يخصرو لنومرو السترينغ الي تبيع فيه و كان تحكي عالانفتاح عالاخر خليك غادي و متدخلش تحتو هالسقف خاطر الطلاين و الاجانب متعرفهم كان في الرايونو و الطرف سيكونسات بورنو الي تتفرج فيهم في الفايس بوك و تستمني بيهم في خيالك المريض باش تكتب بيهم لحظات انتصار و لذة جسدية محروم منهم
الحاصل لانترنات قداش لمت شلايك تبقى كان جات دنيا دنيا و احد يبيع في الملابس الداخلية يعمل قروب و يطالب بمحاكمتي ؟و الله العيب موش فيه في البهايم الي تبع فيه و هنا استثني البيغ تراب بوي الي بلحق طلع واقعي برشة و انسان رزين رغم الحملة الي تعرضلها و الا نتصور هي زادة في اطار تصفية حسابات
المهم تصور ناس تسمي روحها وجه ثقافي في البلاد ماشيا للحاكم قالك شنوة انا اسمي مورو وموكل من النخبة المثقفة و نبيع في الملابس الداخلية في دار دعارة و نحب نشكي بواحد اسمو تونسي جويست ههه تي حتى الحاكم يقوم يضحك عليكم من البهامة
المهم منطولوش معاه السيد هذا و هاني تو سنياليتو شماتا فيه و نتعداو لشخص الثاني
الي هو احمد ايزام و كان هذا انا حكى عليه في مدونتو
الشخص هذا اقذر من اني نحكي عليه و قت يتخبى ورى حاسوب عايلي و يحط بروفيلات بنات و يبدى في هاو عاهرة في هاو هاذي جايب و احد في الحرام
نتصور انو اي انسان مهما كان دينو و الا توجهو ميرضاش بمثل هذه الممارسات الظلامية خاصة انو هتك شرف و تهم باطلة نتمنى انو المعنين بالامر يقومو بالواجب و يتصلو بالاجهزة الامنية رغم انو لحكاية مهاش مستبعدة برشا
المهم الاشكال في الصفحة هاذي

الصفحة هاذي ملي تعملت مدرتش بيها لا وليت فيها فان لا قربتلها اضافة كان جيت انا الي عملتها منجمش نخرج منها و تصويرة توضح لانا موش ادمين
وهاذي شهادتي و اختصاصي بون اخر شهادة خذيتها و من مدرسة سياحية معروفة عل الاقل خير منك منيش ماخو مضمون ولادة من وكر دعارة


الحاصل التدوينة هاذي موجهة لاصدقائي المدونين باش ميضنوش الضنون و يطالبو بالدليل عندما يذكر اسمي على افواه هؤلاء المرضى

اضافة انا راو منيش كيفكم متخبي ورا اسم افتراضي المدونين كل تعرف صورتي و اسمي العايلي بون موش الكل اما الاغلبية و السبب اني منمدش كشختي هنا خاطر ثمة ناس مرضا كيفكم هويايتها سرقة الصور و الاسامي و الارهاب

و حبيت نقللكم حاجة راو تيتوف كي باش يمسح بواحد الارض ميستحقش باش يتخبى ورا صفحة
و هذا معروف عليه متخباش من جماعة القفة باش يتخبى من نكرات كيفكم واحد بطال مطرد من جامعة و نازح لبنزرت و لاخر يبيع في الملابس الداخلية في وكر دعارة

من النسف الى التهديد

Posted: Monday, March 22, 2010 by titof in
5

هذا الصباح تلقى والدي رسالة كتب عليها الرجاء الاتصال بيا حالا و ذيلت ب "رئيس الاقليم"

ابي رجل متقاعد و ليس هناك مايدعو دائرة الاقليم الى الاتصال به ما يجعلني اعتقد جزما ان الامر يتعلق بنشاطي التدوني

ربما قررت اجهزة البوليس بعد نسف مدونتي و حساباتي على الفايس بوك الانتقال الى مرحلة التهديد و التخويف و الزج بعائلتي في امر لا يعنيها لدفعهم ربما لضغط عليا حتى اوقف نشاطي التدوني

لا اريد ان استبق الاحداث كما لا اريد ان احقر من الامر

و اغلب الظن ان هذه اخر تدوينة اخطها و اخر تواجد لي بينكم في هذا البلاد الذي يؤمن بالقوة و العنف و اللجم

و الان يا حميدة يا من تفني وقتك في محاولة الكشف عن هوية المدونين و مد اجهزة الامن باسمائهم الحقيقية لك ان تصرخ الان في نشوة و تسكر من كلماتي و تردد كما رددت اول مرة حين نسفت مدونتي الله اكبر ظهر الحق و زهق الباطل

السلام احبتي

ياعمّار ليس هكذا تحطم الاقلام الحرّة

Posted: Saturday, March 20, 2010 by titof in
6

تجلس الى حاسوبك لتفتح صفحة الفايس بوك خاصتك فتطالعك رسالة حمقاء مفادها ان حسابك توقف عن العمل بفعلة فاعل بداية الامر تعتقد انها عملية قرصنة في علاقتك بالهجمات ضد عصابات الكنائس الانجلية التي اختارت تونس بعد المغرب و الجزائر محطة لها لتبشير

فتبتسم ساخرا من غباء هؤلاء و تفتح حسابا جديدا غير اسف على نصوص كتبتها في رثاء و طن يعانق اسوار الخوف و اصدقاء يمكنك اعادة لمّ شملهم في لحظات

و عند الانتهاء من تعديل حسابك الجديد و رغبة منك في اعادة جمع نصوصك و بالانتقال الى مدونتك تكتشف انها "دمّرت بالكامل "وينتابك ذاك الشعور المرّ الذي لا يمكن ان تشعر به الا اذا عايشّت التجربة لتسقط معه كل الشّعارات التي رفعتها يوما معتقدا انك و برغم الظلم و الحصار انسان حر تقول ما تريد و تتحدث كيف ما تشاء

هكذا و ببساطة قررت و كالة الانترنات ان تقضي على افكار و بعض كلمات ونصوص شعرت انها يمكن ان تهدد الامن الوطني المزعوم و تقضي على عام من الكتابة حيث انه لم يمكني الا ان اتحصل على ارشيف 2009

عمل جبان و خطير و كما يشبهه صديقنا طارق "بالفضيحة"فضيحة في بلد يدعي انه ديمقراطي و يتعامل بلغة الحوار

بلد اعتنق ثقافة الاغتيال في الساحات العامة امام الناس جميعا

بلد يزداد توحشا و ارهابا

معتقدا ان القرصنة و تدمير المدونات ستثني اقلاما اختارت ان تكون حرة

و ليس غريبا هذا الاعتقاد على بلد لا يدرك ما معنى ان يكون القلم حرا

فالقلم الحر يا سادتي هو القلم الذي لا ينحني و لا يكسر و لا يثنيه الحصار

و لاول مرة وجدتني حائرا مترنحا من هول الضربة الموجعة و التي زادها الما تفاعل البعض معها

حيث انكر بعضهم عملية تدمير مدونتي مشيرا الا انه يمكن ان اكون انا صاحب الفعلة فالحجب عنده شرف لا يستحقه اي كان ؟

و لعل اغبى التفاعلات تلك التي ضمنها احدهم باعتقاد عمار اني انتمي الى عصابات السلفية و لم يبقى الى ان يتصل باجهزة مكافحة الارهاب ليعتقولني

غريب امر بعضهم بل يدعو الى السخرية و خاصة اذا كنت قد تضامنت مع بعضهم في عدة مناسابات

نعم لقد كنت في الصف الاول عندما كان القذر عمار يحط رحاله بمدونة احدهم رافضا كل انوع الحجب حتى مع الذين كنت اختلف معهم و لعل اخر تدوينة تدل على صحة كلامي

واذكر اني حتى قررت الافصاح عن هويتي الحقيقية في موضوع مكافحة الحجب

و رغم كل هذه التفاعلات الغبية لن انسى اولائك الذين شدوا على يدي سواءا باتصالهم هاتفيا او عبرالرسائل الالكترونية و لقد ذهب بعضهم بعيدا الى الحد الذي عرض عليا فيه زيارتي الى بيتي لدعمي معنويا

اضافة ان موقفي من الحجب لن يتغير حتى مع اولئك الذين شككوا فساضل ادافع عن حقهم في التعبير و ان حجبوا ساكون في الصف الاول لدفاع عنهم

كما لا يجب ان انسى اني املك دليلا يثبت وجود عملية القرصنة اودعته لمدون "هذا انا" بعد ان رفضت تضمينه في هذه المدونة حيث اني وجدت ان الامر عبثي ان اكون انا الضحية و في نفس الوقت ان اكون في موقع المدافع عن نفسه لفعل يراه البعض شرفا و اراه انا تخلفا

في الحجب و التغفيص

Posted: Thursday, February 25, 2010 by titof in
0

الحجب عنا ولا مسالة عادية و يومية لدرجة انك تستغرب اذا تعدات مدة و مقص عمار مرفع حد و لا الحق مدونة بركب المغفورين لهم

حكاية برشة و ان كانت على المستوى الفكري تذكرنا بعصابات "الغبرة البيضة" في كولومبيا الي كانت تغتال في السياسين بسبب مواقفهم و اراؤهم

الحكاية متشابها و منراش فرق عل الاقل من ناحية المضمون

مقص عمارالمرة هاذي حط الرحال متاعو بمدونة لينا بن مهنى باش ياكد مرة اخرى انو احنا ناس مزلنا محتاجين للوصاية و انو لوغة شعبنا قد بلغ من الوعي اليوم ليست الى شوطة بصبع الكبير متع مدافع مقدرش يقنع في الخطة متاعو فالتجأ" لديقاجمونات "و الشوطان

برشة ناس تعتقد انو الحجب يخضع لالية معينة و شروط و معاير لكن من الواضح جدا انو لحكاية هاذي مفروغ منها و الاكيد انو عملية الحجب هي عملية عشوائية اشبه باسراب الجراد الي تهاجم الحقول بما معناه انو الحجب معندوش معاير كيفو كيف الارهاب متعرفش و قتاش يضرب و ين و علاش؟؟؟

الي يتبع مدونة لينا بن مهنى اكيد يلاحظ الجراة الي فيها و تنوع القضايا الي تتناول فيها لكن ابدا ميتوقعش انو المدونة هاذي باش تتحجب لانو وبساطة المدونة هاذي حافظت على سقف معين في حكاية التعبير و متطاولتش للحديقة الخلفية متع الباشا ...على هذاكة حجب مدونة لينا خلاتني مستغرب شوية رغم انو متستغرب شي من عمار و مقصو ..الا اذا كانت العملية استقابية و عمار يعرف نوايا الناس بالمسبق

المصافحة اعتراف و الموقف سلاح

Posted: Tuesday, February 16, 2010 by titof in
0

لن اكتب نصا مليئا بالشعارات حتى لا تقول احداهن في نرجسية المنقذ و المحيط علما بصغائر الامور و كبائرها "مزعمنا في رفع الشعارات"و لن انصب محكمة للتفتيش النوايا ملقيا التهم هنا و هناك حتى لا يكون النقاش غوغائيا مليئا بالتّرهات

جميعنا يدرك ان العدو الصهيوني و لن اقول اسرائيل ارضاءا لصحاب البيت الذي يقمع كل صوت يعلو في وجهم

تسعى بشدة الى اختراق مغربنا العربي بعد ان اخترقت شرق العرب ....سياسيا و فكريا و فرضت نفسها هناك و اقصت دول الطوق من دائرة الصراع العربي الصهيوني

الا ان المغرب العربي المتماسك شعبيا ظل حصنا منيعا امام "البروبقندات"الصهيونية التي تحاك هناك في صحراء المغرب

فبعد ان نجحوا في استقطاب الامازيغ لظلهم هاهم يحاولون اقناعنا بفكرة تواجدهم بيننا و لما لا فتح سفارة صهيونية في احد هذه الدول ان نحن استسغنا فكرة ما يسمى نفاقا"بالحوار "العربي الاسرائلي

فاسرائيل عبر المنظمات الامريكية المشبوهة اقامت مؤتمرا تكوينيا لمدوني المغرب العربي و كان المدونين في حاجة الي تكوين او تعليم و تاهيل و حسب راي ان الامر لايستحق شهادة علمية كي تكون مدونا فالموضوع في حد ذاته يفور غباءا ليجعل اصحاب العقول تضحك من سذاجته

و المصيبة ليست هنا ولكن في تبرير بعضهم لتطبيع "علاش منسمعوش الراي الاخر ؟؟و شنية الفايدة في تجاهل اسرائيل"

لماذا علينا ان نستمع لاسرائيل ؟هل تعتقدون ان هناك سوء تفاهم ان اونظرتنا للكيان الصهيوني قد تكون غير موضوعية او فيها التباس الامر الذي يقتضي الاستماع لهذا الكيان الطفيلي

لا ...يا دعاة التطبيع ..اسرائيل تتكلم و هي اكثر من يتكلم و لو تعمقتم في الامر قليلا لا لحظتم اننا نحن من يحتاج ان يتكلم ليس هم و ان يتكلم للعالم ليس اليهم

فهم دائما يتكلمون ..انسيتم انهم يملكون كل وسائل الاعلام و اكثر وسائل الانتاج و حتى مستقبلكم ؟

و لغة الحوار عندهم هي الدبابة و الرصاص ..غريب و الله امر بني و طني

ثم تتسألون عن جدوى المقاطعة ؟

المقاطعة لو لم تكن تاتي اكلا و الرفض لو لم يكن بنتائج لما دعتكم اسرائيل المندسة في صحراء المغرب للحوار معكم

هي تدرك ان المدونين فاعلون في وسطهم و ان العديد من ابناء مغربنا الغالي يّطلعون على ما نكتب فحضور كلمة تطبيع و اسرائيل و زحزحتها من خانة العدو الذي نلفظ اسمه في وجل خوفا من ان يدنس افواهنا الى الشريك في طاولة الحوار من شانه ان يعطيها بعض الشرعية لتضع اللبنة الاولى في مشروع اختراقها للمغرب

فاسرائيل ليست قصيرة النظر و مشاريعها ذو صبغة بعيدة الامد فلاتعتقدو ان يكون الامر واضحا او ان مشروعها ذو فترة محدودة مما يمكننا من كشفها

و انما هي تبني لغد يطول قدومه فيميزها علينا هو الصبر و النظرة البعيدة

و اخيرا هذه مقدمة لنقاش في موضوع التطبيع

لا لسجن الطلبة

Posted: Friday, February 5, 2010 by titof in
0

البوست هذا الي موضوعو الطلبة الي تشدو على خلفية نشاطهم السياسي يتزامن مع حجب مدونة صديقنا طارق مدونة افكار ليلة الي الواضح انو عمار ذاق ذرعا بالافكار الليلة و معاتش عندو وسع بال وهذا موش مستغرب من ناس تؤمن بالحلول الجذرية و رافضة فتح اي باب للحوار مهما كان شكلو

الحاصل نغلقو القوس و هات نفركو رومانة هالطلبة الي انا في بالي كيما اي انسان يتمتع بمينيموم متع انسانية انو المكان الطبيعي متع طالب هو المدارج المغطاة موش متع التيرنات و انما الجامعة

وانو تواجدهم في غرفة التحقيق و السجون هو نقطة سوداء في تاريخنا كتونسين و خاصة انو التواجد متاعهم في بوفردة مردّو نشاطهم السياسي يعني هاذي مهاش ناس تحوص بطرة و الا تبيع في الخمر خلسة في المبيت الجامعي

و انما ناس تلمت باش طالب بحقها في السكن الجامعي تلقى روحها في السكن السجني يارسول الله ؟

موش معقول انو عام سنا يكون عام عالمي متع شباب و في الحبوسات متاعنا عنا طلبة

ياخي مهمش شباب هاذم

الواضح انو الحلول الجذرية و لات سياسة فيكس و لا تراجع عنها في وجه كل من تسولو نفسو يحاول يحل فمو وينتقد

بون بالنسبة ليا كمدون نعلن تضامني اللامشروط مع طلبة مهما كانت توجهاتهم نشا الله حتى يتبعو في ربطة كلافز مدام تحركاتهم سلمية

و السلام

هما

Posted: Tuesday, February 2, 2010 by titof in
0

هو

الاشياء صارت مملة و لااحد مازال يؤمن بجدوى النضال

هي

الاشياء الغبية وحدها هي التي تبقى

هو

لونترك الارض و ماعليها وننسى الجرح ونودعه مراكب الرحيل

هي

لا ...الرحيل عار

هو

و البقاء انتحار

هي

هل تذكر تلك الشجرة التي زراعنها ونحن اطفال وتعهدنا ان نرعها معا

هو

لكنها ماتت حتى قبل ان تذكر ربيعها العاشر

هي

ماتت واهدتنا فلسفة ..ماتت لتنبت من جديد في قلوبنا

هو

الاشياء الغبية وحدها هي التي تبقى

هي

و الاشجار وحدها هي التي تتشبث بالارض و تموت واقفة في شموخ

هو

تلك حرب خاسرة ..و الشتاء يكتم انفاس الربيع

هي

بل هي البداية فوحدها النار تذيب الجليد

هو

اسلحتنا مشلولة ...واقلامنا تعلو ققمها ممحاة

هي

قلم الدموع لاتمحيه المؤامرات

هو

و لكن الخوف يقتلعنا ...يطوق اشياءنا ويعري احزاننا

هي

لن ارحل

هو

سيجمدك الصقيع و سيجف ربيع قلمك

هي

لن ارحل

هو

سيقتلعونك كما اقتلعوا شجرتنا التي لم تتم ربيعها العاشر

هي

لن ارحل

هو

قدرك ان تكتبي الحرية خلسة

هي لن ارحل

.......................

في الوطنية

Posted: Wednesday, January 20, 2010 by titof in
0

مرحلة تطويها اخرى ليطالعنا شعار جديد ليس اقل سخفا وغباءا من سابقيه فبعد ان صادروا الوطن و ختموه بختم السلطان انطلقت وكالات اعلامهم الناعقة تحدثنا في سخافة و استبلاه عن "الوطنية" بعد ان صارت المفاهيم و القيم في وطني بائعة هوى تعرض جسدها بلا مقابل في حانات البغاء و دور "الندوة"

كم صارت الاشياء مملة و سخيفة و كم صار الوطن ضيقا رغم اتساعه و كم صار الشوق الى الرحيل بعيدا عن الذين اضطرك الله ان تقاسهم في ضيق زوايا الوطن المصلوب على خشبة البيع الحرام شديدا

"الوطنية" حصروها في قطعة جلد مدور يركلها وتركونا نتقاتل فيما بيننا حولها في مشهد يركل مؤخرتنا من سجل الحضارة ليعيدنا الى الجاهلية الاولى و عصبية العروش و القبائل

فليس حب الوطن عندهم في ليلة اخرى باردة يقضيها فرسان الحرية وراء الاسور العالية و الاسلاك الشائكة وراء حديد القضبان

وليست الوطنية عندهم"سعال" اطفال المدارس و قد ارهقت حناجرهم صرخات وجدت في القنابل المسيلة لدموع جوابا

و ليست الو طنية عندهم نشيدا او قصيدا او كلمة حق عند سلطان جائر

و ليست التضحيات الجسام التي ما نفكوا يتحدثون عنها و ليست احترام الوطن و القانون....و.....و...و

"فالوطنية"هي القدرة على ركل الكرة و اسكنها في الشباك

الوطنية هي القدرة على ركل مؤخراتنا و ارغامنا على ركوع

الوطنية شعار مفرغ من معناها كآلاف الشعارات التي لم تزد الأغنياء الا ثراءا و بطشا

ولم تزد الفقراء الا دموعا و فقرا

حرب افتراضيّة بين المدونين "التجمعيّين" والمُستقلين

Posted: Thursday, January 14, 2010 by titof in
0

الموقف - العدد 529 بتاريخ 15 جانفي 2010


تحوّل الفضاء التدوينيّ في بلادنا أو ما اصطلح المدونون على تسميته بـ"البلوغسفار" إلى ساحة حرب "طاحنة" بين المدونين "التجمعيين" الذين يسمون أنفسهم بـ"المدونين الوطنيين" و آخرون مستقلون أو معارضون.

ويبدو أن وجهتي النظر المتناقضتين أدتا في أحيان كثيرا إلى تعطيل الحوار الذي حلّ محله تبادل التهم بالخيانة والعمالة وانعدام الوطنيّة.

المدوّن المستقلّ المعروف باسم "تيتوف" ، والمشرف على مدوّنة "موطني" http://unsimplemec.blogspot.com/ ،تعرّض لهجمة من قبل "التجمعيين "واتهم بـ"العمالة" و"التطرّف" بعد أن انتقد تصورات الحزب الحاكم والمدونين المنحازين له ،وفيما يلي ، يكتب "تيتوف" لـ"الموقف" عن التشنّج الذي يشهده الفضاء التدوينيّ وغياب ثقافة الحوار لدى مدوّني الحزب الحاكم:


في بلد أقصت حكومته كل أنواع الفكر المخالف ، وجد بعض الشباب التونسيّ في "البلوغسفار" منبرا حرا للتعبير عمّا يختلج في صدورهم من آراء و أفكار.
و عرف هذا الفضاء محاولات متكررة وعديدة للنيل منه وتركعيه ، إمّا من خلال الحجب كما حصل مع عدد من المدونات المستقلة ونذكر مثلا مدونة "زياد الهاني" التي حجبت 16مرة ، أو بالاعتقال والهرسلة والتحقيق مثلما حصل مع الزّميلة "فاطمة اربيكا"على خلفية نشاطها التدويني.
ورغم الحصار والحجب والاعتقال واصل المدونون الكتابة عبر النت مؤمنين بحقهم في حرية التعبير و إبداء الرأي.
إلا أنّ المتربّصين بهذا الفضاء الحرّ وجدوا في زرع عناصر تحمل التوجه الحكومي وتدافع عنه خير وسيلة لتطويق "البلوغسفار" التونسي وتدجينه.
ومن هنا ظهر "المدونون التجمعيون" أو من يسمون أنفسهم بـ"المدونين الوطنيين" في احتكار صارخ لمفهوم الوطنية وفي إشارة إلى أنّ من يخالفهم الرأي ينتمي ضرورة إلى معشر "اللاوطنين".
ولقد برّر الوطنيون ظهورهم في "البلوغسفار" برغبتهم في الحوار و تسليط الضوء على "المغالطات" التي يقدمها المدونون التونسيون على أنها حقائق ،إلا أنّ الأمر سرعان ما انكشف عن حقيقته .
فالمتابع لهؤلاء المُدونين يلاحظ أنّهم لا يرغبون في الحوار بقدر ما يرغبون في الدعاية للحكومة و الحزب الحاكم والتصفيق لهما بلغة خشبية لا تشجع البتّة على الحوار.
ويغلب على مدونات "التجمعيين" (الوطنيين) طابع القص اللصق دون اعتماد خطة واضحة لخلق فضاء حوار ذاتي، إذ غالبا ما يعتمدون على ما ينشر في الصحف الرسمية من مقالات دعائية فيقومون بإعادة نشرها عبر مدوناتهم.
كما عمد بعض المدونين "الوطنين" إلى غلق خدمة التعليق عبر مدونتاتهم، مما جعلهم يصادرون حقّ التفاعل مع ما يكتبونه في حين أنّ الفضاء الالكترونيّ يختلف عن الواقعيّ في القدرة على التفاعل الآنيّ و التعليق على الفكرة في الإبان، وهو ما لم يتحمّله التجمعيون.
هذه السلوكات التي تضيق بالرأي المخالف دفعت أحد الزملاء إلى تشبيه مدونات "الوطنين" بالتقارير الإخبارية التلفزية ،عندما كتب في إحدى تدويناته "التلفزة في البلوغسفار" إشارة إلى اعتماد بعض المدونين المحسوبين على الحزب الحاكم لنفس الخطاب التلفزي (تونس 7) عبر النت.
كذلك يرى المتابع لتدويناتهم أنّ معظمها تقوم على الاتهام بالعمالة والخيانة والطعن في الوطنية والولاء لتونس ، فلا تكاد تخلو تدوينة من تدويناتهم من كلمة "الشرذمة الناعقة" أو "المتمسحين على أعتاب السفارات الأجنبية" وقد مضى بهم الأمر بعيدا إلى حد تشبيه البعض بـ"الكلاب" وإطلاق غيرها من الشتائم التي تعيق الحوار والتواصل.
ناهيك عن لعب دور الضحية و "الأقلية المضطهدة" التي يتآمر عليها بعض "أصحاب النفوس المريضة والحاقدة".
وهذا ما حصل معي منذ أيام ، عندما رفضت الحوار مع أحد "الوطنين" ،فسارع إلي استعمال تقنية (تصوير الشاشة) لنشر ما كتبت ، ولاتهامي بعدم الوطنية و"الديكتاتورية" وإطلاق السباب من قبيل "خوانجي" ، حدث كل ذلك اثر رفضي للحوار معه عن الديمقراطية في مجموعة محجوبة ، وجدت أنه من النفاق و الازدواجية أن أناقش موضوعا مشابها في صفحة حجبها الحزب الذي ينتمي إليه هذا "الوطنيّ".
وعلى اثر الحملة التي شنّت ضدّي وجدتُ الكثير من المساندة من زملاء مُستقلين عن الحزب الحاكم ويؤمنون فعلا بحرية التعبير.
ويرى الوطنيون أن المستقلين يشنون حملة ضدّهم قصد إسكات أصواتهم في الوقت الذي لم يطلب فيه زملائي ( على غرار المدونتين "بنت عائلة" و"موانئ") سوى تفسيرا لجملة من التساؤلات ،و لقد ذهب أحد "الوطنيين ويدعى "حميدة" إلى اتهامنا بـ"الحقد و التآمر" في عملية تذكرنا بمحاكم التفتيش في القرون الوسطى والتي تهدف إلى محاسبة نوايا الناس والنبش فيها ، في الوقت الذي كان نفس المُدون يثني على هاتين المُدونتين المُستقلتين.

ومن هنا يلاحظ المتابع لحركة التدوين التونسية ازدواجية المواقف والمعايير غير الواضحة ، فمن جهة إن كنت مسايرا لهؤلاء ومنحازا للحزب الحاكم فأنت وطني ، أمّا إن كنت غير ذلك وأبديت رأيا مخالفا، فستكون – ضرورة - في خانة النفوس الحاقدة والخونة، وهذا ما سنتصدى له كمدونين تونسيين مستقلين ووطنيين، نُؤمن فعلا – لا شعارا- بحرية التعبير.

المدوّن (تيتوف )

في ردّم الهوة الرقمية الجزء لول

Posted: by titof in
0

في مدينة من المدن متاعنا تلقى مسؤول من اك الجماعة الي يلبسو كوستيمات ونهار كامل كراهبهم بلان شادة طريق بن قردان و سوق ليبيا اعلام بزيارة متع مسؤول من سلطة الاشراف

يولي المسؤول هذا متع المدينة يلم البلاد الكل ويعمل رافل عل القهاوي قالك شنوة تحبوش تخدمو نهارب30الف

وركز في الرافل متاعو على اصحاب الشهايد العليا لين مخلى حد و الي مقلوش بلاصة بعثو في رحلة بلاعودة لمدة سنة الى ظلال الثكنات العسكرية شمال البلاد و حتى الي عدى عامو عاود بعثو بحجة انو الروح الوطنية طايحة مونك عندو

و ليه ليه تجبد الدهن و نظافة البلاد لدرجة انك تتخيل روحك تحوص في لاس فيغاس و الا مدينة من عاصمة الانوار

هيا حل ركب السيد المسؤول للمدينة هاكي و بدى يتمشى في شوارعها الغريب انو كانت المدينة نظيفة برشة و خالية من لعباد الشي الي خلاه يسئل المسهول المحلي ....

سلطة الاشراف ....تي شبي البلاد فارغة من لعباد يا ولدي و كان العجاج يخيط ...ياخي ثمة كورة ليوم

المسهول لا لا....الناس الكل تخدم سيدي ...نسبة البطالة عنا صفر في لميا

سلطة الاشراف ....اي ...اما هاو عندكم قهاوي ...محلولة و فيها عباد

المسؤول المحلي ...هاكم موش قهاوي سيدي و انما مراكز ثقافية ..ماو تماشيا مع توجهات الدولة نحو الحداثة و دعم الثقافة رينا انو من الواجب متاعنا توفير المناخ الملائم لثقافة و ادراجو ضمن المقاربة الشاملة متع مدينتنا

سلطة الاشراف و على وجهو الاعجاب و الله يعطيكم الصحة ...نجمو نشوفو القهوة و نعاينو ؟؟

المسؤول المحلي ..اكيد

يدخل سلطة الاشراف و المسؤول ومعاهم حضبة البنادرية

يجي السيرفور يجري

السيرفور ...مرحبا بيكم سيادتكم في قهوتنا العزيزة و باسمي و باسم كل وجه ثقافي نوجهلكم تحية عطرة و نثني على جهودكم الجبارة في النهوض بالقطاع التقهويجي و ادراجو ضمن المخطاطات العليا لسياستكم

يكمل السيرفور اك الكلمتين الي جمعة كاملة و هوما يحفظلو فيهم و يطبس راسو كوم كوا احترام

يخصرلو سلطة الاشراف واك الابتسامة متع الاعجاب تزيد تتحل حتى لين ولات تشبه لربوان سكرة ويتلفت للمرافقين متاعو و يقللهم

هاي الناس ولا لوح ...هذا اذا القهواجي متاعهم يحكي هكة ملا المثفقين متاعهم كفاش

ويرجع يتلفت لسرفور و يقلو ..اش باش تضيفنا اليوم ؟؟

السرفور ...و الله عنا كبوسان بالوجودية و اكسبراس بفلسفة الانوار و عنا ديراكت برسالة الغفران وغير و انتي اش تختار

سلطة الاشراف يربت على كتف القهواجي باعجاب و يقولو اخترلنا انتي وليدي مدام انا عملت دورة في المركز الثقافي

يكمل سلطة الاشراف دورتو وياقف عند طاولة متع راجل كبير حالل كتاب و قدامو اكسبراس عاقدة تقولش سطل بغلي

سلطة الاشراف...سلام حاج

الحاج...اهلا وليدي

سلطة الاشراف ..فاش تشرب بابا

الحاج ..اكسبراس حوار الشباب

سلطة الاشراف ...ايه حاجة هايلة بابا ....وفاش تقرى

الحاج...ليلى و الذئب

سلطة الاشراف ...هاو القصص متع العبر و القيم ..اي حاج شنوا تعمل في دنيا

الحاج ...و الله وليدي عامل عامين محو الامية و عام تعليم الكبار اختصاص هندسة رقمية و نخمم نشا الله نعمل بحوث معمقة في زراعة الارقام و تحويرها و كان سهل ربي نبعث مشروع و نتصب لحسابي الخاص

سلطة الاشراف

أي حاجة هايلة بابا علاش لا تو ننظرو في الامر و ابعثلنا ملفك و احنا نشجعوك

ومن غادي يتلفت للمسؤول المحلي و يسألو

_واصحاب الشهايد العليا متع المدينة و الشباب متاعك وينهم ؟؟